تزوجتي جمعي راسك وتبتي في دارك

[size=24]نعم بنتي كيف كتقراي دابة" تزوجتي جمعي راسك وتبتي في دارك"
لكلام مع الي تزوجات وقريبة من دارهم
بلاش ديك خيطي زيطي لداركم توحشت ماما توحشت خوتي
علاه المزوجات الي معمرين دارهم وشايفين رجالتهم ما عندهم كبدة كيكرهوا دارهم مثلا ؟
راه "الشيء ان زاد عن حده انقلب الى ضده" هاد المثل عمرك ما سمعتيه ؟
الصراحة كنتعجب لبعض لبنات ملي كتزوج عاد كتحلى لها دارهم ماماها باباها خوتها بيتها دكرياتها صحباتها
والصراحة كنتعجب اكثر من ام كتزوج بنتها وما كتساعدهاش على انها تكون زوجة مسؤولة في بيتها
واش هادي انانية ولا عدم وعي ولا جهل راه بنتك هادي بغي لها الخير
ماماك جالسة في دارها وجامعة بناتها حاسة بالسعادة وما فبالهاش راجلك مسكين
ماماك الا ما فكراتش فيه فكري انت فيه راه مسؤول منك وغادي تتسالي قدام الله على تقصيرك من جيهتو
واش الا كان الراجل ضريف ما تيقول والو نستغلوا الطيبة ديالو؟
راه الا كان راجلك صابر عليك " اتقي شر الحليم"
راه غادي يتسيف عليك في يوم وترجعي تقولي راجلي تبدل ما بقاش كي كان في الاول قبل الزواج
اوالراجل مشغول نخليوه مشغول حتى يبعد عاد نقول راجلي بعيد عليا وتغير ولا كيشوف غيري؟
سمحي لي ابنتي نصحك لوجه الله تبثي في دارك باش تعرفي تربطي راجلك بك
الزواج هو يجي راجلك من الخدمة يلقاك في دارك انت الي تحلي ليه الباب
الزواج هو يجي الراجل من الخدمة يلقاك مطيبة لغدا ماشي هو يتغدا بوحدو في دارهم وانت تتغداي عند ماماك
الزواج هو يجي الراجل من الخدمة ويبغي يرتاح يلقاك جنبوا تغطيه تشاركيه لحديث حتى ينعس
الزواج هو يفيق الراجل في الصباح يلقاك سابقاه وموجدا ليه لفطور وكتسنايه تفطروا مجموعين تفتحي ليه النفس
الزواج هو يجي راجلك من برى ويبغي يضحك معاك فراحتو حقو كتحرمي راسك منو حتى انت
الزواج هو تعمري دارك وتخلقي فيها جو وتديري بلاصتك فيها حتى الا غبتي في يوم عن راجلك تبقى بلاصتك ويحس بها
الزواج هو تهيئي الجو الي غادي يترباو فيه ولادك في المستقبل
ولا انت عزيز عليك لوناسة والهضرة والضحك وما تهزي مسؤولية ويبقاو لكتاف خاويين ولعقل الله يجيب؟
ما باغية تجمعي ما باغية تدخلي للكوزينة ما باغية تشقاي ما باغية تفكري ما باغية تهزي هم الراجل مريض الراجل عليه ضغوط الراجل باغي مرى مع من يهضر ؟
اشمن زواج هدا الي ما تدخلي لدارك حتى لليل حتى تبغي تنعسي يعني الزواج عندك هو النعاس ولفياق ؟
شحال غادي تعيش لك ماماك او غادي يبقاو لك داركم؟
وانت يا للا يا ام لعروسة
هذي هي مسؤوليتك ؟ هذي هي مسؤولية الرعية ؟ انت كتخلقي هوة بين بنتك وراجلها وكتبعدي بيناتهم وكتخربي عليهم غير بالمهل
تبغي انت ولدك تخليه مراتو وتمشي عند ماماها كل يوم كانه ما مزوجش؟ اكيد غادي تعمريه عليها وتقويه عليها وتحلي له العينين على اخطاء مراتو
اوى كيف بنتك كيف بنات الناس وكيف ولدك كيف ولاد الناس
والمشكل لكبير الي كيتخلق من بعد والكثير غافل عليه هو انك ملي كتولدي كتزيدي تيتي نيني عند ماما او عند دارنا ولدك ولا بنتك تاني كيعيشو نفس القصة تيني نيني عند جدة او لميمة او مي
كنطيحو في التربية المفرقة
الولد او البنت عايش مشتت بين باباه وماماه وبين دار جداه
كيكبر شوية تسوليه او تسوليها فين انت انا عند دار جدة
تسولوا او تسولها جداه انا عند ماما
حتى تعاليم التربية ما كيعرفوا منين ياخدوها واش من والوالدهم ولا من والدين والديهم
والاولاد يبداو يمشيو في طريق الانحراف والضياع
شفتي خيطي زيطي وتيني نيني عند دارنا فين كتوصل ما كتخرجش غير عليك حتى على ولادك

هذا جزء من بعض المشاكل الاسرية التي تشتت الاسر الذي شدني اليوم لكتابته وطرحه واتمنى ان يكون قرصة ودن حنونة على بنات اليوم او من يتعلق بها الامر